राष्ट्रव्यापी प्रणामी फुटसलमा हरिसिद्धिको प्रथम, गोरखा दोस्रो र काभ्रे तेस्रो

ललितपुर / श्रीकृष्ण प्रणामी युवा परिषद नेपाल बागमती प्रदेश, ललितपुर जिल्ला ईमाडोल प्रारम्भिक समितिद्वारा आयोजित राष्ट्रव्यापी प्रणामी फुटसल प्रतियोगिताको दशौँ संस्करण ललितपुरको बलपार्क फुटसल मैदानमा भव्य रूपमा सम्पन्न भएको छ।

देशभरका विभिन्न जिल्लाबाट प्रतिनिधित्व गर्ने २२ टिम र मैत्रीपूर्ण अभ्यासका ६ टिम गरी जम्मा २८ टिमले यस प्रतिस्पर्धात्मक प्रतियोगितामा सहभागिता जनाएका थिए। उद्घाटन सत्रमा श्रीकृष्ण प्रणामी सेवा समिति नेपालका अध्यक्ष एस.के. शर्मा, महालक्ष्मी नगरपालिकाका प्रमुख हरि गोविन्द श्रेष्ठ र वडा नं. १ का अध्यक्ष छिरिङ लामाले संयुक्त रूपमा पानसमा दियो बालेर शुभारम्भ गरेका थिए।

हजारौं दर्शकको उपस्थितिमा रोमाञ्चक खेलहरू क्रमशः सम्पन्न भइरहँदा खेल मैदानमा युवाको उत्साहपूर्ण सहभागिता देखिएको थियो। फाइनल खेलमा हरिसिद्धि प्रारम्भिक समितिले उत्कृष्ट प्रदर्शन गर्दै पहिलो स्थान हासिल गर्दा गोरखा जिल्ला समिति द्वितीय स्थानमा रह्यो। त्यस्तै, काभ्रे भञ्ज्याङ प्रारम्भिक समिति तृतीय र लुभु प्रारम्भिक समिति चतुर्थ स्थानमा रहेका थिए।

विजेता टिमले ३० हजार रुपैयाँ, उपविजेताले २० हजार रुपैयाँ, तृतीय स्थानले १० हजार रुपैयाँ, साथै सबैले प्रणामी ट्रफी र मेडल प्राप्त गरेका थिए।

व्यक्तिगत तर्फबाट हरिसिद्धिका स्वरुपराज तिमल्सिना उत्कृष्ट गोलकिपर र गोरखाका सुमन पोखरेल उत्कृष्ट खेलाडी घोषित भए।

कार्यक्रम ईमाडोल प्रासका अध्यक्ष विशाल खतिवडाको सभापतित्वमा सम्पन्न भएको थियो। प्रमुख अतिथि नगर प्रमुख श्रेष्ठले खेलकुदले युवाबीच सामीप्यता, सौहार्दता र भाईचारा बढाउने उल्लेख गर्दै सफल आयोजनाका लागि शुभकामना व्यक्त गरे।

त्यस्तै, सेवा समिति नेपालका अध्यक्ष शर्मा ले खेलकुदले युवामा अनुशासन, नैतिकता र धर्मप्रति समर्पणको भावना विकसित गर्ने भन्दै यसले दुर्भ्यसनमुक्त, सबल र सक्षम समाज निर्माणमा टेवा पुर्‍याउने विश्वास व्यक्त गरे।

आयोजकका अनुसार, दशौँ संस्करणको भव्यताले सम्पूर्ण सहभागीमा थप उत्साह र प्रेरणा भरेको छ। खेलमा देखिएको जोश, निखार र प्रतिस्पर्धात्मक भावना कार्यक्रमको सफलता प्रमाणित भएको उनीहरूको भनाइ छ।

प्रतियोगिताको सम्पूर्ण खेल ईमाडोल प्रासको फेसबुक लाइभ पेजमार्फत प्रत्यक्ष प्रसारण गरिएको थियो । कार्यक्रम अवधिभर युवा परिषद, सेवा समिति, वाईजुराज समिति तथा देशभरबाट आएका सुन्दरसाथहरूले खेलको रमाइलो प्रतिस्पर्धाको भरपूर आनन्द लिएका थिए।

त्यस्तै, लुभु प्रासले याेमरी र बारा–चटपटेकाे स्वाद सहितको खाजाको स्टल सञ्चालन गरेको थियो भने ‘उद्यमी घर सातदोबाटो’ले प्रमाणपत्र र मेडलको सौजन्य प्रदान गरेको थियो।