शास्त्री श्री घनश्याम अधिकारीद्वारा सेवा पूजा प्रशिक्षण हर्षोल्लासका साथ सम्पन्न

काभ्रेपलान्चोक / निजानन्द सम्प्रदाय अन्तर्गत रहेको श्री कृष्ण प्रणामी धर्मको दैनिकी आचार – व्यवहार र सेवा साधनासँग सम्बन्धित दुई दिने सेवा पूजा प्रशिक्षण कार्यक्रम पौष १९ र २० गतेका दिन श्रीकृष्ण सूर्यदर्शन पाटी प्यालेस, बनेपा–६, बुडोलमा सफलता पूर्वक सम्पन्न भएको हो ।

श्रीकृष्ण प्रणामी धर्मका प्रखर विद्वान युवा धर्मप्रचारक शास्त्री श्री घनश्याम अधिकारीद्वारा सञ्चालन गरिएको उक्त प्रशिक्षणमा सेवा पूजा विधि, निजानन्द दर्शन, आत्मशुद्धि, अनुशासन र सत्संगको आध्यात्मिक महत्वबारे सरल र गहिरो भावसहित प्रकाश पारिएको थियो।

कार्यक्रममा ४५ जना भन्दा बढी श्रद्धालु भक्तजनहरूको उत्साहपूर्ण सहभागिता रहेको थियो। भक्ति, साधना र आत्मीयताले भरिएको कार्यक्रम हर्षमय, शान्त र आध्यात्मिक वातावरणमा सम्पन्न भएको आयोजकले जनाएको छ।

यस प्रकारका प्रशिक्षणले श्री कृष्ण प्रणामी धर्मको मूल मर्मलाई जीवन व्यवहारमा उतार्न थप प्रेरणा प्रदान गरेको सहभागीहरूको भनाइ रहेको छ।