trikaldarshan
ललितपुर / “दुर्व्यसन त्यागौं, सेवाभावी बनौं; हिंसारहित समाज, हाम्रै युवाको आवाज” भन्ने आध्यात्मिक र सामाजिक चेतनाले ओतप्रोत सन्देशसहित श्रीकृष्ण प्रणामी युवा परिषद् नेपाल, बागमती प्रदेश प्रारम्भिक समिति, इमाडोल–ललितपुरको आयोजनामा १०औं राष्ट्रिय ‘प्रणामी कप’ फुटसल प्रतियोगिता–२०८२ आयोजना हुने भएको छ। आगामी कार्तिक २१ र २२ गते इमाडोलमा भव्य रूपमा आयोजना गरिने यो प्रतियोगिता युवाहरूमा सेवा, सादगी र सद्भावको चेतना जगाउने एक पवित्र प्रयत्नका रूपमा लिइएको छ।
धार्मिक भावनासँगै सामाजिक उत्तरदायित्व जोड्ने उद्देश्यले आयोजना गरिएको यस प्रतियोगिताबाट युवाहरूमा सदाचार, आत्मानुशासन, भाइचारा र सेवाभाव अभिवृद्धि हुने अपेक्षा गरिएको छ। खेलकुदलाई केवल प्रतिस्पर्धा होइन, एक प्रकारको आत्मिक साधना मानेर युवाशक्तिलाई सकारात्मक दिशातर्फ डोर्याउने अभियानका रूपमा यस प्रतियोगितालाई अगाडि सारिएको आयोजक समितिले जनाएको छ।
प्रतियोगिताको संयोजन श्रीकृष्ण प्रणामी युवा परिषद् नेपाल, जिल्ला कार्यसमिति ललितपुरले गरेको हो। सम्पूर्ण प्राविधिक तथा व्यवस्थापकीय तयारी पूरा भइसकेको र देशभरका विभिन्न जिल्लाबाट युवा टोलीहरू सहभागी हुने तयारीमा रहेको आयोजकले जानकारी दिएको छ। विजेता टोलीहरूलाई आकर्षक पुरस्कार र सम्मानपत्र प्रदान गरिनेछ भने सहभागी टोलीहरूलाई पनि प्रेरणादायी सम्मान दिइनेछ।
आयोजक समितिले सम्पूर्ण भक्तजन, खेलप्रेमी र युवाहरुलाई उपस्थित भई ‘सेवा, सादगी र सद्भाव’को सन्देशलाई व्यवहारमा उतार्न हार्दिक अनुरोध गरेको छ। फुटसलको माध्यमबाट युवाहरूमा हिंसामुक्त, सकारात्मक र सेवामूलक सोच विकास गर्न र समाजमा प्रेम, शान्ति र सद्भावको वातावरण सिर्जना गर्न प्रतियोगिताले योगदान पुर्याउने विश्वास लिइएको छ।
यो प्रतियोगिता केवल खेलकुदको प्रतिस्पर्धा मात्र होइन, आत्मसंयम र सामूहिक भावना विकास गर्ने एक आध्यात्मिक अभियान हो — जहाँ युवाशक्तिले खेलमै सेवा, भक्ति र सहअस्तित्वको सन्देश फैलाउने अवसर पाउनेछन्।
