काठमाडौँ ।। श्रीकृष्ण प्रणामी युवा परिषद् नेपाल, जिल्ला समिति काठमाडौँद्वारा चाडपर्वको अवसरमा आयोजित विशेष कार्यक्रम अन्तर्गत बलि प्रथा विरुद्ध दीप प्रज्वलन तथा सचेतना अभियान सम्पन्न गरिएको छ।

चाडपर्वका दिनहरूमा परम्परागत रूपमा विभिन्न शक्ति पीठ तथा देवीदेवताको मन्दिरमा पशुपंक्षी तथा चौपायाको बलि दिने चलन प्रचलित रहँदै आएको छ। तर परिषद्ले भने धर्मको वास्तविक सार बुझ्नुपर्ने आवश्यकता औंल्याउँदै निर्दोष प्राणीको हत्या नगरी आत्मिक बलि दिनुपर्ने सन्देश प्रवाह गरेको हो।

कार्यक्रममा सहभागीहरूले दीप प्रज्वलन गर्दै दिवंगत भएका पशुपंक्षी र चौपायाहरूको स्मरण गरेका थिए। परिषद्को तर्फबाट वक्ताहरूले “साँचो बलि भनेको आफ्ना विकार, अहंकार, द्वेष, क्रोध र लोभलाई त्याग्नु हो, निर्दोष प्राणीको ज्यान लिनु होइन” भन्ने आध्यात्मिक मन्तव्य प्रस्तुत गरे।

युवाहरूले हातमा शान्ति, करुणा र अहिंसाका सन्देशसहितको प्लेकार्ड बोकेर समाजलाई चेतना जगाउने उद्देश्य प्रकट गरे। कार्यक्रममा धार्मिक एवं सामाजिक व्यक्तित्वहरूले बलि प्रथा परम्पराको नाममा निरन्तरता पाउनु दुःखद भएको उल्लेख गर्दै धर्मले कहिल्यै हिंसाको समर्थन नगर्ने स्पष्ट पारे।

श्रीकृष्ण प्रणामी दर्शनले शुद्ध प्रेम, करुणा र आत्मज्ञानलाई नै साँचो उपासना मानेको हुँदा परिषद्ले आगामी दिनमा पनि यस्ता जनचेतनामूलक अभियानलाई निरन्तरता दिने प्रतिबद्धता जनाएको छ।

कार्यक्रमको अन्त्यमा उपस्थित सबै सहभागीहरूले समाजलाई अहिंसा, प्रेम र करुणामय बाटोतर्फ अघि बढाउन संकल्प व्यक्त गरेका थिए।