trikaldarshan
बुढौली, चितवन / श्री कृष्ण प्रणामी युवा परिषद रक्तसञ्चार शाखाको संयोजनमा तथा श्री कृष्ण प्रणामी मन्दिर श्यामनगर, बुढौली चितवनको ५०ौँ स्वर्ण महोत्सव तथा कलश अनावरण समारोहको अवसरमा आयोजित १०८ पाठ पारायण अन्तर्गत बृहत् रक्तदान कार्यक्रम सफलतापूर्वक सम्पन्न भएको छ।
कार्यक्रममा विभिन्न स्थानबाट आएका ४२ जना रक्तदाताले रक्तदान गरी मानवीय सेवाको उदाहरण प्रस्तुत गरेका छन्। रक्तसञ्चार शाखाका संयोजक राधेश्याम गजुरेलले जीवनरक्षासँग जोडिएको पवित्र कार्य रक्तदानमा सहभागी सबैप्रति हार्दिक आभार प्रकट गरेका छन्।
उनका अनुसार, “रक्तदान जीवनदान हो। मानव जीवन बचाउन प्रत्येक थोपा रगत अपरिहार्य हुन्छ। यस पुण्यकार्यमा प्रत्यक्ष–परोक्ष रूपमा सहकार्य र समर्थन गर्ने सबैप्रति धन्यवाद व्यक्त गर्दछु,” भन्ने धन्यवाद मन्तव्यसमेत व्यक्त गरिएको थियो।
यस महादान कार्यक्रमलाई सफल बनाउन सहयोग पुर्याएको भन्दै चितवन जिल्ला युवा परिषद, बुढौली प्रारम्भिक समितिका सेवाभावी सदस्यहरू, र रक्त सञ्चार शाखा चितवनलाई विशेष धन्यवाद व्यक्त गरिएको थियो।
कार्यक्रमले समुदायमा सामाजिक उत्तरदायित्व र सेवाभावलाई थप सुदृढ बनाएको आयोजकहरूले बताएका छन्।
