ललितपुर, लामाटार / आत्मिक उन्नति, स्वास्थ्य र पर्यटन प्रवर्धनका उद्देश्यसहित श्रीकृष्ण प्रणामी युवा परिषद्, बागमती प्रदेश, ललितपुर जिल्ला अन्तर्गत लामाटार प्रासबाट हरेक वर्षझैँ यस वर्ष पनि सामूहिक पदयात्रा (Hiking) कार्यक्रम–२०८२ आयोजना हुँदैछ।

“दुर्व्यसन त्यागौँ, सेवामुखी बनौँ – महालक्ष्मी नगरपालिकाको पर्यटन प्रवर्धनमा हाम्रो प्रयास” भन्ने प्रेरणादायी मूल नाराका साथ सञ्चालन हुन लागेको यो पदयात्रा कार्यक्रम मिति २०८२ कार्तिक २९ गते शनिबारका दिन लामाटार क्षेत्रका प्राकृतिक, धार्मिक र पर्यटकीय दृष्टिले समृद्ध स्थलहरूमा सम्पन्न हुने तय गरिएको छ।

यस वार्षिक आध्यात्मिक यात्राको उद्देश्य केवल शारीरिक तन्दुरुस्ती मात्र नभई मन, बुद्धि र आत्माको पवित्रिकरण पनि हो। प्रकृतिसँग आत्मीय सम्बन्ध स्थापित गर्दै, आध्यात्मिक चेतनालाई जागृत गर्ने यो अभियानले युवाहरू माझ सेवा, सादगी र सद्भावको सन्देश फैलाउँदै आएको छ।

शान्त वातावरण, हरियाली पहाड, धार्मिक आस्थाका स्थानहरू र सामूहिक भावनाको संगममा हुने यो पदयात्राले सहभागीहरूमा सकारात्मक सोच, संयमित जीवन र नशामुक्त समाज निर्माणप्रति प्रतिवद्धता जगाउने विश्वास लिइएको छ।

श्रीकृष्ण प्रणामी युवा परिषद्ले विगत वर्षहरूमा जस्तै यस वर्ष पनि स्थानीय समुदाय, युवा समूह र भक्तजनहरूको सक्रिय सहभागितालाई स्वागत गर्दै, यस कार्यक्रमलाई धार्मिक पर्यटन प्रवर्धनको एउटा प्रेरक उदाहरणका रूपमा अघि बढाउने लक्ष्य राखेको जनाएको छ।

आयोजक समितिका अनुसार, सामूहिक पदयात्रामा सहभागी हुनेहरूका लागि आध्यात्मिक प्रेरणा, ध्यान–साधना र सामूहिक भजनका माध्यमबाट आत्मबल वृद्धि गर्ने अवसर पनि मिल्नेछ।

सन्देश स्पष्ट छ :-

“जहाँ सेवा छ, त्यहाँ शान्ति छ;

जहाँ शान्ति छ, त्यहीँ परमात्माको अनुभूति छ।”

यस पवित्र प्रयासमा सम्पूर्ण युवाशक्ति, श्रद्धालु भक्तजन तथा स्थानीयवासीहरूलाई उत्साहका साथ सहभागी भई “सेवा –  सादगी – सद्भाव”को मार्गमा अघि बढ्न हार्दिक आह्वान गरिएको छ।