मकवानपुर जिल्ला, हेटौंडा उपमहानगरपालिका वडा नम्बर १६, रंगशाला वाग्लेचोक निवासी माता सुन्दरबाई वाग्ले र पिता साधुराम वाग्लेका सुपुत्रका रूपमा वि.सं. २०२६ माघ २३ गते मकवानपुरको हटिया वडा नम्बर ९ मा जन्म भएका हुन्। बाल्यकालमै धर्मप्रतिको आकर्षण र सेवाभावले प्रेरित भएर १२ वर्षको उमेरमा चिसापानीस्थित मन्दिरमा ‘बालमण्डली’ गठन गरी अध्यक्षको रूपमा सेवायात्रा आरम्भ गरेका थिए।

वि.सं. २०५१ सालमा युवापरिषद् प्रासको कोषाध्यक्ष हुँदै अध्यक्षसम्मको जिम्मेवारी वहन गरेका उनी त्यसपछि क्रमशः जिल्ला सदस्य, उपाध्यक्ष, जिल्ला अध्यक्ष र एक कार्यकालका लागि केन्द्रीय सदस्यसमेत बने। साथै, सेवासमितिको मन्दिर उपाध्यक्ष तथा केन्द्रको धर्मप्रबर्धक विभागका सदस्यका रूपमा सक्रिय रहेपछि हाल उनी सेवासमिति बागमती प्रदेशका उपाध्यक्षको रूपमा कार्यरत छन्।

उनीसँगको यी दीर्घ अनुभव, देशभर रहेका सुन्दरसाथी र व्यवसायिक मित्रहरूसँगको आत्मीय सम्बन्धकै आधारमा ‘प्रणामी व्यवसाय संघ’ स्थापना गर्ने प्रेरणा मिलेको हो। श्री धर्मधनी देबचन्द्रजीका पिताजी स्वयं व्यापारी हुनुहुन्थ्यो भन्ने ऐतिहासिक पृष्ठभूमिले समेत यस संस्थाको स्थापना भावनात्मक र ऐतिहासिक दृष्टिले सुदृढ बनाएको छ।

व्यापारीहरूबीच आध्यात्मिक चेतना, नैतिकता र एकताको भावनासहित व्यवसायिक संस्कार विकास गर्नु नै उहाँको जीवनको मुख्य उद्देश्य हो।

प्रस्तुत छ त्रिकालदर्शन डट कमका लागि सञ्चारकर्मी सन्तोष बजगाईंले ‘प्रणामी व्यवसाय संघ’ का संस्थापक केन्द्रीय अध्यक्ष श्री विष्णु प्रसाद वाग्ले ज्यूसँग गरेको विशेष अन्तर्वार्ता।

१. प्रणामी व्यवसाय संघको स्थापना कहिले र किन गरिएको हो?

👉 प्रणामी व्यवसाय संघको स्थापना वि.सं. २०७८ सालमा भएको हो। यसको उद्देश्य देशभर विखण्डित रूपमा रहेका प्रणामी व्यवसायीहरूलाई एउटै संस्थागत मञ्चमा एकत्रित गरेर धर्म, संस्कृति र व्यवसायलाई एकसाथ अगाडि बढाउनु हो।

२. प्रणामी व्यवसाय संघको मूल उद्देश्य के हो?

👉 आध्यात्मिक चेतनासहितको व्यवसायिक नेतृत्व निर्माण गर्नु हो। संघले व्यवसायलाई मात्र आर्थिक लाभको माध्यम होइन, सेवा र सदाचारको बाटोका रूपमा अघि बढाउने लक्ष्य लिएको छ।

३. प्रणामी व्यवसाय संघको संगठनात्मक संरचना अहिले कस्तो अवस्थामा छ?

👉 संघले सातै प्रदेशमा विस्तारको अभियान चलाइरहेको छ। हाल ४ वटा प्रदेश र ११ वटा जिल्लामा शाखा विस्तार भइसकेको छ र अन्य जिल्लामा पनि क्रमशः विस्तार हुँदैछ।

४. प्रारम्भिक चरणमा प्रणामी व्यवसाय संघले कस्ता चुनौतीहरू सामना गर्नुपर्‍यो?

👉 मुख्य चुनौती देशभरका व्यवसायीहरूलाई एउटै प्लेटफर्ममा ल्याउने थियो। संगठनात्मक ढाँचा निर्माण, विश्वास कायम गर्ने र स्थायित्व दिलाउने काम चुनौतीपूर्ण भए पनि सामूहिक प्रयासले सफल बनायो।

५. सदस्य बन्नका लागि के मापदण्डहरू तोकिएका छन्?

👉 श्रीकृष्ण प्रणामी दर्शनमा आस्था राख्ने, व्यवसायिक रूपमा संलग्न र इमानदार तथा सदाचारी व्यक्ति हुनुपर्ने मापदण्ड छ।

६. प्रणामी व्यवसायी संघले व्यवसायहरूको हितका लागि हालसम्म के–के कार्य गरेको छ?

👉 व्यवसायिक सीप विकास तालिम, कर सचेतना, सहकारी सहकार्य, आपसी सहयोग र विपद् व्यवस्थापनका अभियानहरू सञ्चालन गरेको छ।

७. प्रणामी व्यवसाय संघले धार्मिक र सामाजिक क्षेत्रमा कस्तो भूमिका खेलेको छ?

👉 हरेक प्रमुख प्रणामी धार्मिक पर्वमा आर्थिक तथा व्यवस्थापकीय सहयोग गर्दै आएको छ। साथै विद्यालय, मन्दिर, वृद्धाश्रम र विपन्न समुदायमा सेवा कार्यक्रमहरू सञ्चालन गरिन्छ।

८. युवापुस्ता र नयाँ उद्यमीहरूका लागि प्रणामी व्यवसायी  संघका कार्यक्रम के छन्?

👉 “युवा व्यवसायी नेतृत्व कार्यक्रम” सञ्चालन गरिएको छ जसअन्तर्गत नयाँ उद्यमीहरूलाई प्रशिक्षण, सल्लाह र लगानी अवसर प्रदान गर्दै व्यवसायमा आत्मविश्वास जगाइन्छ।

९. महिला व्यवसायी सशक्तीकरणका लागि संघको योजना के हो?

👉 महिला व्यवसायी उप–समिति गठन भइसकेको छ। महिलाको सीप अभिवृद्धि, पूँजी पहुँच र व्यवसायिक सल्लाहका कार्यक्रमहरू नियमित रूपमा सञ्चालन हुँदैछन्।

१०. श्रीकृष्ण प्रणामी दर्शन र व्यवसायबीचको सम्बन्ध कस्तो छ?

👉 प्रणामी दर्शनका तीन आधार — सत्य, प्रेम र सेवा — नै व्यवसायको नैतिक ढाँचा हुन्। सत्यनिष्ठ व्यापार, ग्राहकप्रतिको प्रेम र समाजसेवा नै धर्मसम्मत व्यवसाय हो।

११. प्रणामी व्यवसाय संघले व्यवसायीहरूबीच एकता र सहकार्य कसरी बढाइरहेको छ?

👉 “एक धर्म, एक परिवार, एक व्यवसायिक शक्ति” भन्ने मन्त्रमा संघ अघि बढ्दैछ। साझा लगानी, नेटवर्किङ र अनुभव साटासाटका माध्यमबाट व्यवसायीहरूलाई एकीकृत गरिँदैछ।

१२. वैदेशिक रोजगारबाट फर्किएका युवालाई कसरी आकर्षित गरिँदैछ?

👉 “फर्किएका हात, आफ्नै व्यापार” अभियानमार्फत सीप र पूँजीलाई जोडेर उद्यमशीलता प्रोत्साहन गर्ने योजना अघि बढाइएको छ।

१३. संगठनभित्र पारदर्शिता र उत्तरदायित्व कायम राख्न के उपाय अपनाइएका छन्?

👉 वार्षिक प्रतिवेदन, लेखा परीक्षण र खुला बैठक प्रणाली अनिवार्य गरिएको छ। हरेक निर्णय सामूहिक छलफल र सहमतिको आधारमा गरिन्छ।

१४. प्रणामी व्यवसायी संघका आगामी पाँच वर्षका प्रमुख लक्ष्यहरू के हुन्?

👉 सातै प्रदेशमा बलियो सञ्जाल बनाउने, महिला र युवा व्यवसायी नेटवर्क विस्तार गर्ने, र अन्तर्राष्ट्रिय तहमा “Pranami Business Network” स्थापनाको योजना छ।

१५. देशभरका प्रणामी व्यवसायी र युवाहरूका लागि तपाईंको सन्देश के हो?

👉 सत्य, प्रेम र सेवा — यी तीनलाई जीवन र व्यवसायको मूल मन्त्र बनाऔँ। एकतामा शक्ति छ, विश्वासमा सफलता छ, र धर्ममा स्थायित्व छ।