trikaldarshan
काठमाडौं, कात्तिक ४ / नेपालीहरूको महान् पर्व बडादसैँअन्तर्गत आज बुधबार विजयादशमी हर्षोल्लासका साथ मनाइँदैछ। आजको दिन मान्यजनबाट दुर्गाभवानीको प्रसादस्वरूप टीका, जमरा र आशीर्वाद ग्रहण गरिन्छ।
नेपाल पञ्चाङ्ग निर्णायक विकास समितिका अनुसार २०८३ साल कात्तिक ४ गते विजयादशमीको टीकाको उत्तम साइत बिहान १० बजेर २६ मिनेटमा रहेको छ। त्यस्तै, देवी विसर्जनको साइत बिहान ८ बजेर ४९ मिनेटमा निर्धारण गरिएको छ।
समितिका अनुसार शुभ साइतमा टीका ग्रहण गर्दा टीका थाप्ने व्यक्ति पश्चिम फर्कनुपर्नेछ। यद्यपि, विजयादशमीका दिन दिनभर मान्यजनबाट टीका, जमरा र आशीर्वाद ग्रहण गर्न सकिनेछ।
विजयादशमीलाई असत्यमाथि सत्य र अधर्ममाथि धर्मको विजयको प्रतीकका रूपमा लिइन्छ। यस पर्वमा परिवारका सदस्य, आफन्त तथा मान्यजनबीच टीका र जमरा लगाई सुख, शान्ति, समृद्धि, सुस्वास्थ्य, दीर्घायु तथा उत्तरोत्तर प्रगतिको कामना गर्ने परम्परा छ।
बडादसैँले पारिवारिक एकता, आपसी सद्भाव, प्रेम र सामाजिक भाइचारालाई थप सुदृढ बनाउने विश्वास गरिन्छ।
