trikaldarshan
मण्डनदेउपुर / काभ्रेपलाञ्चोक जिल्लाको मण्डनदेउपुर नगरपालिका–११, राम्चे चाखोलाको माथिल्लो क्षेत्रमा लामो समयदेखि पर्याप्त वर्षा नहुँदा मकैबाली सुक्खाको चपेटामा परेको छ।
स्थानीय कृषक भिमसेन सापकोटाका अनुसार वर्षा अभावका कारण मकैबालीको वृद्धि प्रभावित हुन थालेको छ। खेतमा हरियाली देखिए पनि जमिनमा आवश्यक चिस्यान नहुँदा बाली ओइलाउने अवस्था सिर्जना भएको उनले बताए।
समयमै पानी नपरे उत्पादनमा उल्लेख्य कमी आउने चिन्ताले स्थानीय किसानहरू थप पीडित बनेका छन्। वर्षायाम सुरु भइसक्दा पनि अपेक्षित वर्षा नहुँदा कृषकहरू आकाशतिर हेरेर पानीको प्रतीक्षा गर्न बाध्य भएका छन्।
स्थानीय कृषक सापकोटाले भने, “आकाशतिर हेरेर पानीको प्रतीक्षा गर्नुबाहेक किसानसँग अर्को विकल्प छैन।”
यदि आगामी दिनमा पर्याप्त वर्षा हुन नसके राम्चे चाखोला क्षेत्रको मकै उत्पादनमा गम्भीर असर पर्ने र किसानले ठूलो आर्थिक क्षति व्यहोर्नुपर्ने अवस्था देखिएको स्थानीय कृषकहरूको भनाइ छ।
