बेथानचोक / ज्योतिझैँ चहकिलो लक्ष्य, आकाश–पाताल र भूगोलका कुनाकाप्चामा लुकेका सत्य–तथ्यको खोजी गर्ने अठोट तथा समाज, राष्ट्र र विश्वलाई सत्यका पक्षमा जागृत गराउने दृढ सङ्कल्प बोकेर अघि बढ्नु पत्रकारिताको वास्तविक धर्म हो। यही धर्म र मर्मलाई आत्मसात् गर्दै सञ्चार जगत्को सुन्दर ऐनाका रूपमा स्थापित पत्रकारिता पेसामा सक्रिय, खरो र मिठासपूर्ण लेखनशैलीका पारखी, मेरा प्रिय भाइ, सहकर्मी तथा मित्र सन्तोष बजगाईको सञ्चालकत्वमा त्रिकालदर्शन डट कमले आफ्नो प्रकाशन यात्रा शुभारम्भ गरेकोमा हार्दिक बधाई तथा अनन्त शुभकामना व्यक्त गर्दछु।

नाममै गहन अर्थ बोकेको त्रिकालदर्शन अर्थात् भूत, वर्तमान र भविष्यलाई समेट्ने दृष्टि। विगतका भोगाइबाट शिक्षा लिँदै, वर्तमानका यथार्थलाई निर्भीकतापूर्वक उजागर गर्दै र भविष्यका सम्भावना तथा चुनौतीको सूक्ष्म आँकलन गर्दै पाठक, समाज र राष्ट्रलाई सुसूचित गराउने यसको उद्देश्य प्रशंसनीय छ।

पत्रकारिता केवल समाचार सम्प्रेषण गर्ने माध्यम मात्र होइन; यो समाजको ऐना, जनताको आवाज, अन्यायविरुद्धको खबरदारी र सत्यको पक्षमा उभिने सशक्त माध्यम पनि हो। सत्यलाई सत्य र गलतलाई गलत भन्न सक्ने साहस, तथ्यमा आधारित निष्पक्ष प्रस्तुति, जिम्मेवार अभिव्यक्ति र जनहितप्रतिको प्रतिबद्धताले नै पत्रकारिताको वास्तविक उचाइ निर्धारण गर्छ।

आजको सूचना प्रविधिको तीव्र विकास र भ्रामक सूचनाको चुनौतीपूर्ण परिवेशमा सत्य, तथ्य र जनताको आवाजलाई आफ्नो मूल आधार बनाउँदै त्रिकालदर्शन डट कमले समाजका ओझेलमा परेका विषय, जनताका वास्तविक समस्या, सम्भावना, सिर्जना र उपलब्धिलाई उजागर गर्दै आमजनमानसमा सकारात्मक चेतना जगाउन सफल बनोस् भन्ने हार्दिक कामना गर्दछु।

पत्रकारिताको मर्म र धर्मलाई आत्मसात् गर्दै सत्यको पक्षमा निर्भीक कलम चलोस्, आवाजविहीनहरूको आवाज बनोस्, विकृति र विसङ्गतिविरुद्ध खबरदारी गरोस् तथा समाज परिवर्तनको यात्रामा एउटा विश्वसनीय सञ्चार माध्यमका रूपमा स्थापित हुँदै जाओस्।

सन्तोष बजगाई भाइको नेतृत्वमा त्रिकालदर्शन डट कमले सफलताका एकपछि अर्को सिँढी उक्लँदै निष्पक्ष, विश्वसनीय र जनउत्तरदायी पत्रकारिताको क्षेत्रमा छुट्टै पहिचान बनाउन सकोस्। यसको प्रकाशन यात्रा निरन्तर, उपलब्धिमूलक र प्रेरणादायी बनोस्।

असोज २० गतेदेखि शुभारम्भ भएको यस यात्राले स्थानीय आवाजलाई राष्ट्रिय पहिचान दिलाउँदै समाज, राष्ट्र र समग्र विश्वलाई सत्यको उज्यालोतर्फ डोर्‍याउन सकोस्। सत्यको खोजीमा कलम कहिल्यै नथाकोस्, जनताको विश्वास कहिल्यै नडगमगाओस् र पत्रकारिताको गरिमा सधैँ उच्च रहिरहोस्।

त्रिकालदर्शन डट कमको उत्तरोत्तर प्रगति, सफलताको अनन्त यात्रा र उज्ज्वल भविष्यको कामना गर्दै सञ्चालक सन्तोष बजगाई भाइसहित सम्पूर्ण टिमलाई हार्दिक बधाई, अनन्त शुभकामना तथा प्रणाम! 🙏

राधेश्याम गजुरेल

केन्द्रीय सदस्य

श्रीकृष्ण प्रणामी युवा परिषद् नेपाल