भक्तपुर / सुर्यविनायक नगरपालिका वडा नम्बर १० खुलालगाउँ आध्यात्मिक चेतना, भक्ति भावना तथा धार्मिक संस्कारको प्रवर्द्धन गर्ने उद्देश्यले श्री राधाकृष्ण प्रणामी सेवा आश्रम, खुलालगाउँ भक्तपुरद्वारा ७औँ वार्षिक महोत्सव आयोजना गरिने भएको छ। परम आनन्द र भक्तिमय वातावरणमा सम्पन्न हुने उक्त महोत्सव २०८३ साल बैशाख २२ गतेदेखि २८ गतेसम्म सञ्चालन हुने जनाइएको छ।

आश्रमका संरक्षक सन्त श्री देवाशिषजी महाराजका अनुसार महोत्सवले भक्तजनहरूमा ईश्वरप्रति श्रद्धा, प्रेम, सद्भाव तथा आध्यात्मिक जागरण अभिवृद्धि गर्ने विश्वास लिइएको छ।

महोत्सव अवधिभर भजन–कीर्तन, सत्संग, दिव्य प्रवचन, पूजा–आराधना तथा विविध धार्मिक एवं आध्यात्मिक कार्यक्रमहरू सञ्चालन गरिनेछन्। कार्यक्रममा देशका विभिन्न स्थानबाट भक्तजन, धर्मप्रेमी तथा श्रद्धालुहरूको उल्लेखनीय सहभागिता रहने अपेक्षा गरिएको छ।

श्री कृष्ण प्रणामी सेवा समिति, खुलालगाउँ इकाई समिति, सुर्यविनायक नगरपालिका वडा नम्बर १०, भक्तपुरद्वारा आयोजित यस पावन महोत्सवमा सहभागी भई पुण्य लाभ तथा आध्यात्मिक आनन्द प्राप्त गर्न सम्पूर्ण भक्तजन तथा धर्मप्रेमी महानुभावहरूमा आयोजकले हार्दिक निमन्त्रणा गरेको छ।