trikaldarshan
बनेपा, असोज ६ गते / विपद्ले घर उजाडिएका छन्, परिवारलाई पीडामा धकेलेको छ र धेरैको आँखाबाट आँसु रोकिएको छैन। यस्तो कठिन घडीमा सरकारदेखि नागरिकस्तरसम्म राहत र उद्धारको आवश्यकता बढिरहेका बेला श्रीकृष्ण प्रणामी मन्दिर बनेपाले बाढी तथा पहिरोपीडितका लागि मानवीय सहयोगको हात अघि बढाएको छ।
वि.सं. २०८३ भदौ १० गते रसुवाको भोटेकोसी क्षेत्रमा आएको बाढी तथा त्यसबाट निम्तिएको पहिरोले पुर्याएको क्षतिले धेरै परिवारलाई पीडामा पारेको छ। विपद्को यही पीडालाई महसुस गर्दै बनेपामा आयोजित धार्मिक कार्यक्रममा सहभागी भक्तजन तथा शुभेच्छुकहरूले पीडितको राहतका लागि स्वेच्छिक रूपमा सहयोग गरेका हुन्।
श्रीकृष्ण सेवा समिति नेपाल, इकाइ समिति बनेपाको अग्रसरतामा श्रावण १७ गतेदेखि श्रीकृष्ण जन्माष्टमीसम्म एक महिनासम्म श्रीकृष्ण प्रणामी मन्दिर बनेपामा धार्मिक कार्यक्रम सञ्चालन गरिएको थियो। भजन, कीर्तन र धार्मिक गतिविधिबीच विपद्को खबरले मन छोएपछि पीडित परिवारका लागि सहयोग संकलन गर्ने पहल गरिएको थियो।
भक्तजन तथा शुभेच्छुकहरूले आफ्नो सामर्थ्यअनुसार गरेको सहयोगबाट ६३ हजार ९ सय ८० रुपैयाँ संकलन भएको हो। संकलित रकम बाढी तथा पहिरोबाट प्रभावित पीडित परिवारलाई राहतस्वरूप सहयोग गरिएको छ।
विपद्को घडीमा सरकारको राहत र उद्धार प्रयाससँगै नागरिक समाज, धार्मिक संघसंस्था र आम नागरिकको मानवीय सहयोग पनि उत्तिकै महत्वपूर्ण हुने प्रधानमन्त्रीबाट व्यक्त हुँदै आएको विपद् व्यवस्थापनसम्बन्धी जोडको भावनासँग समेत यो पहल जोडिएको देखिन्छ। दुःखमा परेकालाई सहयोग गर्नु केवल आर्थिक सहयोग होइन, पीडितलाई ‘तपाईंहरू एक्लै हुनुहुन्न’ भन्ने भरोसा दिनु पनि हो।
यस सहयोगसम्बन्धी जानकारी दिँदै श्रीकृष्ण प्रणामी मन्दिर बनेपाका सचिव श्री उद्धव प्रसाद तिमल्सिनाले विपद्को कठिन घडीमा भक्तजन तथा शुभेच्छुकहरूले स्वस्फूर्त रूपमा गरेको सहयोगप्रति आभार व्यक्त गर्नुभयो। उहाँले धार्मिक आस्थासँगै मानवीय सेवा र सामाजिक उत्तरदायित्वलाई प्राथमिकतामा राखेर सहयोग संकलन गरिएको बताउनुभयो।
बाढीले बगाएको घर फर्काउन नसके पनि, पहिरोले खोसेको सम्पत्ति तत्काल फिर्ता ल्याउन नसके पनि दुःखमा परेको परिवारको हात समात्न सकिन्छ, आँसु पुछ्न सकिन्छ र आशाको एउटा दियो बाल्न सकिन्छ। श्रीकृष्ण प्रणामी मन्दिर बनेपाबाट संकलित ६३ हजार ९८० रुपैयाँको सहयोग त्यही मानवीय भावनाको एउटा उदाहरण बनेको छ।
श्रीकृष्ण सेवा समिति नेपाल, एकाइ समिति बनेपाले धार्मिक तथा आध्यात्मिक कार्यक्रमसँगै मानवीय सेवा, सामाजिक सहयोग र विपद्को समयमा पीडितको साथमा उभिने कार्यलाई निरन्तरता दिने जनाएको छ।
भक्तिको थालनी मन्दिरबाट भए पनि यसको सार मानव सेवासम्म पुग्दा धर्म अझ अर्थपूर्ण बन्छ। विपद्ले दिएको पीडाबीच श्रीकृष्ण प्रणामी मन्दिर बनेपाले दिएको यो सहयोग रकमभन्दा ठूलो सन्देश हो—‘दुःखमा साथ दिनु नै साँचो मानवता हो।’
