सुकुटे डेरीको मारुती भ्यान सुनकोशीमा खस्यो, चालक वेपत्ता

सिन्धुपाल्चोक / पनौती-१० का नवराज खुलालले चलाएको सुकुटे डेरीको मारुती भ्यान सिन्धुपाल्चोकको बलेफी – ५ बाट शुक्रबार सुनकोशी नदीमा खसेको छ। दुर्घटनापछि चालक खुलाल र भ्यान दुवै वेपत्ता भएका छन्।

प्रहरीका अनुसार स्थानीयले नदीमा भ्यान खसेको देखेपछि खबर गरेका थिए। तत्कालै प्रहरी र सशस्त्र प्रहरीको टोली परिचालन गरिएको छ तर अहिलेसम्म चालकको अवस्था र भ्यानको पत्ता लागेको छैन।

दुर्घटनाको कारण प्रारम्भिक रूपमा खुल्न बाँकी छ। प्रहरीका अनुसार नदीको वेग उच्च भएकाले खोजी कार्यमा कठिनाइ भइरहेको छ। स्थानीय र सुरक्षाकर्मी को संयुक्त टोलीले सतत खोजी कार्य जारी राखेको जनाएको छ।